अ‍ॅड. आकाश हाळणवर यांचा न्यायालयात युक्तिवाद; दोषारोपपत्र दाखल होण्यापूर्वीच जामीन
कर्जत : प्रतिनिधी
कर्जत तालुक्यातील मिरजगाव पोलिस ठाण्यात दाखल असलेल्या अल्पवयीन मुलीच्या प्रकरणात आरोपी शुभम भाऊसाहेब ननवरे यांना श्रीगोंदा येथील जिल्हा न्यायाधीश-२ तथा अतिरिक्त सत्र न्यायालयाने नियमित जामीन मंजूर केला आहे. आरोपीला ९ ऑक्टोबर २०२६ रोजी अटक करण्यात आली होती. त्यानंतर २३ ऑक्टोबर २०२६ रोजी न्यायालयाने जामीन अर्जावर निर्णय दिला. विशेष म्हणजे, दोषारोपपत्र दाखल होण्यापूर्वीच आरोपीला जामीन मंजूर झाला आहे.
या प्रकरणात आरोपीच्या वतीने अ‍ॅड. आकाश हाळणवर यांनी न्यायालयात बाजू मांडली. आरोपी निर्दोष असून, त्याच्यावर या प्रकरणात खोटे गोवण्यात आल्याचा युक्तिवाद बचाव पक्षाने केला. आरोपी महाविद्यालयात शिक्षण घेत असून, त्याच्या पूर्वीच्या वर्तनाबाबत गुन्हेगारी इतिहास नसल्याची बाबही न्यायालयाच्या निदर्शनास आणून देण्यात आली.
दुसरीकडे, सरकारी पक्षाने गुन्ह्याचे गांभीर्य लक्षात घेऊन जामीन अर्जाला विरोध केला होता. तसेच, आरोपीकडून पीडित मुलीचा पाठलाग करून त्रास दिल्याचा आरोप असून, साक्षीदारांवर दबाव येण्याची शक्यता सरकारी पक्षाने न्यायालयासमोर मांडली.
दोन्ही बाजूंचा युक्तिवाद आणि तपासाची सद्यस्थिती विचारात घेऊन न्यायालयाने आरोपीला २५ हजार रुपयांच्या वैयक्तिक जातमुचलक्यावर आणि एका जामीनदाराच्या अटीवर नियमित जामीन मंजूर केला. जामिनासाठी न्यायालयाने काही अटी घातल्या आहेत. त्यानुसार आरोपीने पीडित मुलगी किंवा अभियोजन पक्षाच्या साक्षीदारांशी प्रत्यक्ष अथवा अप्रत्यक्ष संपर्क साधू नये, पुराव्यांमध्ये फेरफार करू नये, तपासासाठी पोलिसांना सहकार्य करावे आणि न्यायालयीन सुनावणीस नियमित उपस्थित राहावे, असे निर्देश देण्यात आले आहेत.
तसेच, दोषारोपपत्र दाखल होईपर्यंत आरोपीने कर्जत तालुक्याच्या हद्दीबाहेर राहण्याचे निर्देशही न्यायालयाने दिले आहेत. जामीन मंजूर होणे म्हणजे आरोपी निर्दोष ठरला असा अर्थ नसून, प्रकरणातील अंतिम निर्णय न्यायालयीन प्रक्रियेनंतर होणार आहे.
About the Author
