स्वप्नील चव्हाण, अजित परदेशी यांना सुवर्णपदक; भाग्यश्री धनवडे हिने पटकावले रौप्यपदक
कर्जत : प्रतिनिधी
अहिल्यानगर येथे क्रीडा विभागीय समितीच्या वतीने आयोजित आंतरमहाविद्यालयीन कुस्ती स्पर्धेत कर्जत तालुक्यातील तीन खेळाडूंनी घवघवीत यश संपादन केले. स्वप्नील बाळासाहेब चव्हाण आणि अजित आनंदसिंग परदेशी यांनी सुवर्णपदकांची कमाई केली, तर भाग्यश्री धनवडे हिने रौप्यपदक पटकावले. या यशामुळे कर्जत तालुक्याच्या क्रीडा क्षेत्राच्या शिरपेचात मानाचा तुरा रोवला गेला आहे.
या स्पर्धेत दादा पाटील महाविद्यालय, कर्जत येथील स्वप्नील बाळासाहेब चव्हाण याने ७३ किलो वजन गटात प्रतिस्पर्ध्यांवर मात करत प्रथम क्रमांकासह सुवर्णपदक मिळवले. स्वप्नील हा एम.ए. द्वितीय वर्षात शिक्षण घेत आहे.
तसेच, भाग्यश्री धनवडे हिने ५३ किलो वजन गटात उत्कृष्ट कामगिरी करत रौप्यपदकासह द्वितीय क्रमांक मिळवला. अजित आनंदसिंग परदेशी याने ७७ किलो वजन गटात दमदार खेळाचे प्रदर्शन करत सुवर्णपदक पटकावले. अजित हा एम.ए. प्रथम वर्षात शिक्षण घेत आहे.
मेहनत, जिद्द अन् सरावाच्या जोरावर यश!
कुस्ती स्पर्धेत या तिन्ही खेळाडूंनी केलेली कामगिरी कर्जत तालुक्यासाठी अभिमानास्पद ठरली आहे. नियमित सराव, कठोर मेहनत, जिद्द आणि प्रशिक्षकांचे मार्गदर्शन यांच्या बळावर त्यांनी हे यश संपादन केले. त्यांच्या या कामगिरीमुळे कर्जतच्या क्रीडा क्षेत्राच्या नावलौकिकात भर पडली असून, इतर विद्यार्थ्यांनाही क्रीडा क्षेत्रात उल्लेखनीय कामगिरी करण्याची प्रेरणा मिळणार आहे.
या यशाबद्दल तिन्ही खेळाडूंवर सर्व स्तरांतून अभिनंदनाचा वर्षाव होत आहे. दादा पाटील महाविद्यालयाच्या क्रीडा विभागाच्या वतीने यशस्वी खेळाडूंचे हार्दिक अभिनंदन करण्यात आले. महाविद्यालयाचे प्राचार्य डॉ. संजय नगरकर यांनीही खेळाडूंच्या यशाचे कौतुक केले.
कर्जतच्या या युवा मल्लांनी आपल्या कर्तृत्वाने पदकांची कमाई करत तालुक्याचा गौरव वाढवला असून, त्यांच्या यशामुळे आगामी काळात कुस्ती क्षेत्रात आणखी मोठी भरारी घेण्याच्या आशा पल्लवित झाल्या आहेत.
About the Author
